壹傳媒（282）前副主席周安橋，2006年加盟九龍倉（004）專責內地地產業務，2011年7月升任九倉董事兼副主席，佢每年袋幾多人工即刻喺年報內大公開。舊年佢就袋走500萬花紅，連埋薪金、福利，年薪總額1,015萬，較2011年半年總額257萬，明顯三級跳。
62歲嘅周安橋曾經係壹傳媒副主席，做咗三年零八個月，2002年底離職，當時佢話打算返內地搞地產生意，幾年後就走咗去幫九倉主席吳光正打理內地地產業務。
九倉另一位副主席兼老臣子吳天海，舊年嘅薪金、袍金金額同周安橋相若，最大分別係花紅，吳天海袋1,000萬花紅，所以酬金總額有1,527萬元。