港人在facebook按like毫不手軟，在日常生活卻絕少讚人，因此Danny放棄月薪30,000多元的好工，成立「我讚！」（Praisage）網頁，好讓市民表揚友善的服務人員，年半下來，累積750個讚，戒賭輔導、洗冷氣機、搬屋都有人讚過。
他透露，有員工獲表揚後加了人工，話時話，Danny幾時向《爽報》讚讚小記？「每次傳媒訪問完我，我都畀番個感謝佢公司」。
記者：陳勝藍 攝影：鄧振權
眼前這人鼎鼎大名，父母替他起名陳偉業，他每次上台講讚賞之道，少不了一句開場白：「今日分享，我一定唔會掟蕉！」英文名Danny Chan更厲害，「朋友覺得我似Danny Chan（陳百強），好斯文，官仔骨骨」。正當35歲的他自稱自讚，記者溫馨提示，陳百強逝世時正是35歲。
他不僅懂得自稱自讚，讚人功夫更了得，去年初成立「我讚！」網頁，劃分18個服務行業，市民每當遇到殷勤周到的招呼，歡迎留言，Danny會將讚賞化為信件，寄給有關公司，如果該公司打算回信給顧客，Danny亦樂意轉達，不收費用。
恩客尋花問柳後，能否讚許鳳姐？「問得好好，風月場所或賭博，我哋都唔登」。原來這項服務謝絕黃賭毒，即使毒品拆家的售後服務再好，賭檔的叠馬仔再親切友善，也不能歌頌，合法投注站卻是例外，「這是消閒娛樂行業，如果個阿姐好用心教你填飛，走時又同你講聲祝你好運，我覺得係正面訊息」。
芝麻綠豆的小事都可以讚不絕口，「我希望大家知道，唔係驚天動地泣鬼神、感動到你流鼻涕先要讚，服務員一個微笑，講句：『要暖水定冰水？』好多人覺得窩心。讚賞係要令對方知道自己優點，邊度做得好，所以讚賞無分大小」。
讚賞最緊要講出口
讚賞要具體，不能只說靚仔，「讚賞有三個元素，第一要有觀察，靚仔都係觀察，但可唔可以細微啲？『咦，你（記者）插住袋，加藍色褲，配呢對鞋，幾有味道！』第二讚賞要有感恩之心，點解我要讚你？因為你嚟採訪。第三要有行動」。
所謂行動，是指讚人要讚出口。「點解三者缺一不可？如果有觀察有行動冇感恩，可以係投訴，『你樣衰衰，覺得自己好有型咩？』」講到尾，原來他覺得我衣着可以，不過樣衰。「如果有觀察有感恩冇行動，人人銘記於心，明明你可以唔吝嗇一句說話，點解唔講？有感恩有行動冇觀察，就似啱啱你講嘅靚仔，冇層次」。
今日的讚人大師，昔日的反叛少年，中二試過離家出走，又在校內偷竊、作弊、擲石打中同學。他不願歸咎老師只罵不讚令他叛逆，「咁我要自我反省，究竟自己有冇做過一啲嘢令老師稱讚？」中三機緣巧合轉讀香港華仁，自此洗心革面，一名老師讚他演講口才了得，Danny未及答謝，後來該名老師離校，再也找不着。
及後Danny在澳洲悉尼科技大學修讀旅遊及市場管理，閒時在中餐館傳菜，一犯小錯，客人即向經理投訴；在便利店打工，客人買熱狗後嫌香腸太冷，熱狗當飛刀，直飛他身上，「唔單止係皮肉慘，仲有精神上折磨」。教他明白世人總是讚少彈多。
畢業回港，先後在旅發局及中電等機構工作過，眼見社會氣氛越來越負面，fb醜事廣傳，好事不揚，三年前毅然放棄月薪逾30,000元的中電地區關係經理高職，在家呆了年半，大做創業夢，「坐梳化、公園、coffee shop，點解？創業一定要有個……唔止決心，更要令自己夠窮。行到水窮處，坐看雲起時，當你夠窮先會諗到之前冇諗過嘅方向，喺嗰年半我真係夠窮，積蓄由有到冇，甚至要問朋友、屋企人借錢生活。如果一開始有人注資200萬畀我，可能今日『我讚!』嘅概念未必咁創新」。
窮到燶時，連自住單位也靠家人代交租金，「唔好講租金，最內疚係呢年半冇畀家用」。家人並不理解，「因呢件事，我同屋企人有九個月冰河時期，佢哋問點解我唔儲夠資金先創業」。猶幸女友全力支持，「佢係舞台演員，佢條路同我有啲似，港大讀完法律，做咗半年律師之後，重新去演藝讀drama」。
唔怕冇嘢做，最怕行錯路，他與拍檔第一個創業大計是生產及零售香港特色紀念品，例如菠蘿油電話座、叉燒包告示貼，「初頭信心十足，女人街、赤柱大街一定賣我哋產品！」後來才醒覺，從事生產難以兼任零售，大計告終，自責：「我同partner都冇做過零售，點解要搞零售？」
來回地獄又折返人間，有次搭西鐵看到銀行廣告，靈機一觸，「讚賞業務就是一間讚賞銀行，開間銀行畀市民存放讚賞，我哋幫你管，同時銀行有專業顧問服務畀企業，市民亦隨時可以嚟攞番『讚賞存款』。我仲蠢到登記一間公司叫『讚賞銀行』，先發現銀行唔可以咁樣註冊。後來由銀行概念演變成網站，畀人有個永恆記錄」。記者問，讚賞存款怎樣提取？「唔開心時可以睇番自己讚過乜嘢人」。
「我讚！」業務主要替各大公司管理及分析所得的讚賞，也搞讚賞培訓班、研討會。辦公室設在數碼港，Danny在該處的培育計劃勝出，免租兩年兼獲33萬元資助，現時唯一支出是幾名員工的人工，他本人每月支薪2,000、3,000元。仍靠家人交租嗎？「𠵱家我窮到搬返屋企住！」
你想爆？幫你爆！
熱線電話：2990 7225
mailto:[email protected]
WhatsApp：9131 4511