梁粉一號張震遠出事，背後政治含義可大可小，同一時間行政會議例會取消，而特首辦新聞統籌專員鄧惠鈞（June Teng）以健康理由請辭，你話梁營政府冇事，有冇人信！
商品交易所被閂水喉，直接關係到張政治後台梁特首地位。張出身港英系統栽培，早年獲魔僧顧汝德賞識，九七後又得林鄭寵信，並向煲呔推薦。佢原本與梁冇乜瓜葛，與張志剛及邵善波等鐵桿梁粉有別。佢之所以埋梁振英堆，為選舉擔大旗，同煲呔及舊港英系統擘面，無非係希望一鋪扑中，挽救早已得番半條命之商交所。張成為king maker後，內地及本土商界富豪要巴結新特首，實要搵張震遠做中間人，因CY乃毒男宅男冇朋友，而張又係king maker自己友，商交所自然可化危為機，大家畀面派對，再集資時總會科水「認」多少，數就係咁計，但點解唔work？
商交所係食內地條水，點解內地資金唔畀面CY，呢個先係重點。首先，北京政策冇變，支持香港搞商品交易，只不過唔信梁與張。梁在金融方面一心「大展拳腳」，本來要搞港版淡馬錫投資公司，最後downgrade成為一個吹水諮詢組織「金發局」，兼由北京信任的查史美倫掌舵。北京最重視香港金融穩定，早早安排前朝財金系統官員集體留任，金管局陳德霖、財經事務局陳家強、梁鳳儀、財政司曾俊華，全部不受梁指揮，目的係為北京睇場，贒實有冇蠱惑嘢。梁之淡馬錫概念被打沉，而發展商品期貨政策則交予港交所（388）執行，CEO李小加成功用天價收購倫敦LME，其實呢一刻已宣告了商交所死刑。
梁根本無力影響本地財金政策，按計劃梁原本安排梁粉陳茂波或張震遠出任副財政司一職，但架構重組被否決，再想借金發局奪權，又部署不周，一宣佈就打柴，在此形勢下，張要發圍談何容易。SFC高層早已受命贒實商交所資金，反映了財金系統官員正忠誠地執行中央交託任務。
June Teng跳船 下一個是誰？
在習李上場後，梁地位更差，兩會期間中聯辦主任張曉明開火炮轟佢只為自己，冇換位思考，北京述職受冷待。內地大孖沙對梁政治走勢一樣收到風，若CY萬千寵愛在一身，試問大孖沙點會對張震遠撲水反應冷淡，打狗至少要睇主人，張陷財困，梁之政治前景大家心中有數！
當年埋堆為梁出謀獻策誅殺唐英年之人，背後均有private agenda，劉夢熊正受ICAC調查、張震遠商交所陷財困，大家希望博一鋪番身，的而且確博到了，但到頭來真係分唔清是福定是禍？梁之近身幕僚June Teng第一個跳船，下一個會係？
添馬男