無綫近排黃金時段收視欠佳，重頭劇《金枝慾孽貳》平均收視得番19點（約122萬觀眾），跌到一地眼鏡碎！好彩新劇《情越海岸線》開播第一個星期收視唔錯，有平均25點收視（約161萬觀眾），除咗因為劇情輕鬆易明，相信同陳茵媺、李詩韻等一班靚女演員有關。尤其係劇中故事圍繞喺長洲發生，點會少得靚女泳裝同重口味劇情呢！
嚟緊朱璇都會着泳裝喺劇中出現，今次佢做嘅角色仲好大挑戰，要勾引KK張國強。朱璇噚日喺電話中話：「今次我演失婚婦人，有少少變態，因為婚姻失敗，唔相信呢個世界有好男人，而演風帆教練嘅KK係絕頂好男人，我咪去學風帆勾引佢，想證明呢個世界冇好男人囉！」朱璇唔止着泳衣，仲會着睡衣同背心、短褲試KK嘅定力，為咗令KK對佢放下戒心，朱璇仲會同KK講話佢唔係女人，係人妖，唔信可以除褲畀佢睇，香艷得嚟又幾搞笑喎！
首次扮唔正經
雖然朱璇講到個角色咁豪放，不過見佢件泳衣只係露背，好難滿足到一眾男fans要求，佢就話：「都係着件保守啲嘅泳衣安全啲！」原來今次係佢第一次做唔正經女人角色，咁佢介唔介意成日着泳衣或者性感演出呢？佢就話：「睇吓劇情需唔需要啦，我就唔係太鍾意，想大家留意我演戲多啲。」我哋梗係會留意你嘅演技啦，不過同場加演埋性感就最「perfect池」，朱璇，抗議無效呀！
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！