昨日本欄文末引述一段關於教科書文字，出自五月十六日信報B3版：「教科書改版與出版商利潤」，作者梁天卓，中文大學經濟系助理教授。梁教授嘅文章主旨係引用美國學者之研究，指出因有舊書市場之存在，教科書出版商加快改版未必能夠增加利潤。本欄所引用梁教授文字，可能係佢用作引子，未必係佢同意嘅，但讀者亦好可能誤會係梁教授嘅私人意見。
常識話俾我地聽，一本從不改版嘅書，如果能夠暢銷十年八年，一定最賺錢。改版喎，唔駛成本咩，一改就要重新印刷，係成本嚟㗎，即使暢銷，都賺少咗。但昨日引述梁教授之文句，雖則只是梁教授文章之引子，已內合偏差：
（一）「中小學的教科書價格高昂和年復一年的大幅加價」，教科書價格與開學及開學後其他支出相比，可說廉宜𠻹，每學年十個月嘅教科書使費，平均收三千元左右，即每月三百元，與每月校巴費、補習費、音樂樂器學費相比，並不高昂，而且家庭收入較低基層可得書簿津貼。今年書價加幅據教育局公佈數字，整體增加3.3%，低於通脹，低於中低級公務員嘅建議加薪幅度3.92%，何來大幅加價？
（二）「出版商為了賺到盡，不斷編訂教科書推出新版本」，其實所有教科書出版前，須經教育局審批，若無有意義改動，教育局唔會批准。以前教育局容許三年改版一次，前年改為只准五年改版一次，所以絕無「不斷編訂教科書推出新版本」之事，此乃坊間師奶嘅誤會，梁教授係教授噃，點解人云亦云，唔查清楚先，香港不少人迷信學者教授之言，佢地寫文章不等於左丁山亂寫專欄，應事先查證。教育局為咗阻止教科書改版，用盡一切方法，一啲電腦課本已經多年不變，與每年推陳出新嘅電腦科技嚴重脫節，成為笑話嘞！
教授寫文或接受訪問應特別小心，唔好隨口噏，學院派教授寫教科書價格問題，至今寫得最詳盡嘅一篇，就係中大財務學王澤基教授前年在「iMoney」發表嘅一篇，有數據有訪問，顯然出咗不少心機，令人佩服。所有學院派教授論述教科書價格，如果冇事先閱讀過王澤基一文，就不足為法嘞，即係懶於做review of literature啫。