【中環ifc】容祖兒前日下午同韓星G-DRAGON出席活動後，換咗便服同波鞋，同助手坐七人車去中環ifc行街。祖兒一落車就同助手急步去咗連卡佛百貨公司，睇嚟佢係有目標而來。祖兒先去睇波鞋同皮鞋，望落啲鞋款似係男裝，睇嚟祖兒係幫男友劉浩龍、佢口中嘅fat dragon買鞋。
睇首飾靚衫
祖兒揀咗好耐，最後睇中一款Nike波鞋，研究咗一輪之後，佢捉住個售貨員問咗好耐先扑槌畀錢，之後仲掃咗一啲男裝服飾，跟手去咗睇女裝牛仔褲，不過揀唔啱心水。冇幾耐，連卡佛嘅店員發現記者，即刻好似如臨大敵咁保護祖兒離開，但係祖兒仲未行夠，雖然明知有記者，佢都只係扁咗一下嘴，之後同助手一人拎住一袋戰利品繼續逛。佢哋先去咗一間首飾名店行咗一個圈，再去名店Valentino睇衫，祖兒行咗大約十分鐘走人。最後，祖兒陪助手入咗Montblanc，助手畀咗張單店員攞筆，祖兒就喺身邊行行企企，唔夠五分鐘就離開上七人車走人。
採訪、攝影：吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！