黃翠如呢期紅爆，除咗深得高層余詠珊寵愛外，連14年前為《鏗鏘集》講六四嘅片都被人拎番出嚟，加上最近又同田蕊妮傳不和，仲話杜汶澤睇唔過眼老婆由第一女主角淪為第二女主角，所以喺網上鬧爆無綫，翠如BB真係樹大招風。
前晚翠如BB同田蕊妮等一班無綫新劇《舌劍上的公堂》嘅演員喺佐敦出席煞科宴，翠如BB喺現場同阿田冇乜交流，只係應傳媒要求合照，不過之後佢哋喺微博又上載攬頭攬頸相，都唔知係真friend定假friend。
阿田唔唱老公歌
提到翠如BB段講六四嘅片熱爆網絡，佢避重就輕話：「好得意，睇番以前嘅自己，好想講以前自己嘅想法好誠實。人長大咗，睇法亦會唔同，𠵱家我嘅睇法就唔會講嘞。」唔通怕政治敏感？佢話唔關藝人身份事，只係怕睇法會影響其他人，佢亦唔驚會影響內地工作：「當時自己係16歲，未到17歲嘅小朋友。」不過一問到佢會唔會再拍同類片時，翠如BB就支吾以對話：「始終好感激當時有呢個機會，要去接受同了解當時嘅自己，因為我唔記得咗嗰一年嘅我。」
阿田自爆嚟緊會同無綫請長假做一件人生第二次大事，嗰件事就係錄歌出碟，佢話：「係黃柏高同我出大碟，會翻唱其他男人嘅歌。」不過佢就無意翻唱老公嘅歌，仲拒絕話：「嗰啲係佢人生污點，唔好再翻唱佢污點，會令佢蒙羞。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！