【本報訊】「今日你至威！」9A狀元梁領彥（Gary）追夢揸巴士故事打動人心，有好友及慕名而來的巿民專程坐其駕駛的巴士；亦有乘客上車認出他是「狀元車長」，開聲稱讚，更多是報以微笑，為免影響行車的Gary只以點頭及笑容作回應。
記者：梁瑞帆 梁偉權
梁昨日如常上班駕駛296M線，行走將軍澳康盛花園至坑口港鐵站，返中更由下午3時至晚上12時。記者到站頭採訪時，已見有兩名「粉絲」等候，Gary坦言沒想過自己成了頭條人物，昨晨故事刊出後，大批好友們以WhatsApp、LINE等手機程式送上祝福，他說好感動，好開心。
Gary點頭Say Hi
記者登上Gary的巴士時，剛好是放學時間，全車幾近爆滿，記者見Gary駕車小心翼翼，顯得有點緊張，由於交通安全法例禁止乘客與巴士司機交談，他對遠道而來的好友只是點頭或Say Hi致意，亦有市民專程到來坐車及拍攝，讓他有點尷尬。
兩名好友Dennis及Edmond特別到來探班，他們透露是在合唱團認識Gary，早知道他夢想是駕巴士，昨閱報得悉他夢想成真，遂由屯門及荃灣遠道而來坐他駕駛的巴士「遊車河」。Gary全程保持專業精神，靜待全車乘客在總站下車及熄掉車匙後，才與兩好友閒談幾句。任鋼琴教師的Dennis稱，他自己亦有夢想，便是在經濟能力改善後，義教更多基層小朋友，Gary的故事給了他很大鼓舞。
慕名而來坐296M的還有兩名廿多歲青年，阿豐及汽車維修員洪先生。洪先生讚揚Gary不計薪酬追尋理想很令人感動，又指職業無分貴賤，追夢是應該的。
阿豐則坦言，Gary在訪問中指「要實現夢想，不要令自己後悔」的說法，打動他及不少人的心。亦有中學生認出名狀元車長後，不斷在車廂內竊竊私語。
Gary「夢想之旅」網誌節錄
夢想之旅（一）
（寫於9/4/2013）
三月尾終於的起心肝去「追夢」。見工、試車、查牌、驗身，估唔到咁順利。結果KMB叫我8/4開始去學車，我就正式開始向我嘅夢想出發。
夢想之旅（二）之西沙公路怒劈熱狗
（寫於13/4/2013）
西沙公路其實就係一條雙線雙程行車，由馬鞍山入到西貢嘅窄路。可能你話條路都唔係好窄啫，平時你搭巴士你可能唔覺，揸架大車就唔同啦，你見到對面架泥頭車風馳電掣咁向我方向嚟緊，我個軚向右轉少少，大家就可以做帛金畀我啦。
夢想之旅（三）之路線揭盅
（寫於20/4/2013）
去到暑假會有啲單層12米金巴揸吓，真係唔簡單㗎，個司機位彈吓彈吓，舒服到好似氣墊船咁。
夢想之旅（四）之最後一課
（寫於28/4/2013）
唔覺唔覺，咁就過咗18日training啦，放埋今日假，聽日就正式實現我嘅理想，去載我第一個乘客。我好耐冇試過咁想返工啦，哈哈。
夢想之旅（五）之開工大吉
（寫於29/4/2013）
我真係好驚有日會有人叫我「司機叔叔」……今朝有個小學生同佢媽咪搭車，好彩媽媽指導佢叫我「司機哥哥早晨！」如果佢叫聲「司機叔叔」，我諗我都真係唔係好笑得出。
夢想之旅（六）之諗唔到有咩title wor
（寫於7/5/2013）
短短七日，我收過嘅失物都有好多款，包括一張學生證，一整袋飯壺，一整袋臭衫等等。
我成個禮拜返工都好開心，發覺自己如果真心鍾意做嗰樣嘢，係唔會覺得悶㗎。
夢想之旅（七）之日夜顛倒
（寫於17/5/2013）
返咗兩個幾禮拜工，最鬼辛苦當然就係每日要四點幾就起身啦。呢啲生活終於可以暫時告一段落，因為九巴規矩，除咗一啲特別情況，每個月嘅月中之後就會轉更。