咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
恭喜雲格，連續16屆晉身歐聯，邊個話阿仙奴力保前4好險，雲格賽後眉飛色舞咁講，今季球隊比上季仲多3分。8年冇冠又如何，史雲斯、韋根拎個盃仔，只係一時間嘅興奮，要長期可以打歐聯，呢啲先係穩健藍籌股應有嘅實力，雲格講過，爭前4比爭盃賽還重要。冇錯，小弟建議英超聯會下季開始，能夠打入前2、3、4都整番個盃畀佢哋捧，等班無知球迷唔好再寸雲格8年冇冠。
恭喜雲格，2,400萬鎊賣走尹佩斯，合計用2,000萬鎊收購基奧特、普多斯基兩位前鋒，球隊有多一個人用，兩個人喺聯賽合共入咗22球，都只係比尹佩斯少4球，不過就慳番400萬鎊，都仲未計尹佩斯嘅巨額周薪。尹佩斯幫曼聯拎英超冠軍又如何？套用股市界術語：賣仔莫摸頭，尹佩斯已經唔係兵工廠嘅人，佢之後點又關雲格咩事。正如費Sir賣走碧咸、C朗，佢哋之後拎西甲冠軍，又有人問費Sir後唔後悔咩？
恭喜雲格，1,500萬鎊賣防中桑治去巴塞隆拿，今季失球數字反而較上季少12個；邊個話踢英超，一定要有一個勇悍兼高大防中，耶耶托尼呢類防中out啦，阿仙奴個中場小矮人陣幾有娛樂性，艾朗藍斯經常表演360度自轉，仲有嚇死人嘅高章後踭。辛迪卡索拉初登英超，嚟到季中已經體力不支，球迷等緊睇佢幾時暈低，仲有阿迪達、韋舒亞、路斯基等「病壞」，忽然間覺得，返咗巴西嘅丹尼臣，其實都唔係太差。文：牽牛