禮拜日打開我哋《蘋果日報》財經版頭版，孫柏文真係開始戥財經版班同事慘。點解？因為佢哋今年都已經做咗唔知幾多次關於日圓跌嘅故仔。
不過我明點解，因日本印鈔全球之冠嘅趨勢唔會變。淨係睇日本經濟用日圓計時，今年第一季有成3.5%增長，股市升到全民皆使錢，如果搵個區議員做日本首相，真係日本通街掛「成功爭取」嘅街板囉！
圓滙仲有排跌
代價，就係日圓滙價急速下跌，同國債息率急升。當然，日政府債台高築，未來都仲要借，所以息口唔可以升，所以更要印鈔買國債去㩒低個息率，最後令日圓進一步下跌。
今年1月8日，當時仲係87日圓買一美元時，我不但叫大家「一注獨沽日圓」，仲要篇文最尾嗰句話「真係想窮都難！」嗰日仲要提供第一站嘅目標價148日圓兌一美元，同將見200，甚至300。嗰遍文之後嘅六個禮拜，我篇篇文都係講點解要沽日圓。好彩編輯冇鬧！
再講，呢排全球係咁吹花旗國聯儲局將會減少甚至結束量化寬鬆。
聯儲局量寬印銀紙，係央行想將政府為財政赤字借嘅錢，唔好扯高息率。咁點知，花旗國傳來消息話花旗政府頭四個半月嘅收入，令赤字縮咗2,000億美元，即係舊年赤字嘅五分之一。市場諗今年咪可以番去以前嘅世界？唔使再量寬？所以美元轉強，金銀仆直，日圓再跌。
其實，根據TrimTabs嘅Biderman，政府收入咁強勁，係因為一、加資產增值稅，所以舊年尾好多人套現，交舊年嘅稅率；二、國有化咗嘅兩房（好耐冇聽過佢哋嘅消息），派一次性嘅股息畀政府；三、增加嘅入息課稅，唔係因為多咗人交稅或工人多咗收入，而係因加咗稅率。可維持？我唔覺。不過美元短暫係會繼續升，沽日圓最易賺，今次大家真係想窮都難！
孫柏文
獨立股評人
http://facebook.com/shuen
本欄逢周二、四刊出