美國片集《CSI》之所以受歡迎，係CSI探員與罪犯鬥智鬥力，在罪犯清理現場證據及指紋後，經抽絲剝繭，仍可取得罪犯大意留下的關鍵證據，將壞人繩之於法。
商交所爆煲事件，SFC緊盯張震遠及其資金狀況近一年，即由他當上行會成員後已keep an eye，本來正準備4月30號採取行動，發出新聞稿釘張震遠牌，但突然被叫停，究竟是否有人想buy time清理現場及抹走指紋呢？
4月30日事件已傳遍SFC高層，紙包不住火，要拖也有一定限度，尤其個別傳媒已知悉並向SFC查詢，若不作了結，包庇下去。只會引起更大政治風暴，連證監也陪葬。
誰是商交所真正客人
從現場留下蛛絲馬迹，可見雙方係有意淡化事件，由張自爆並且安排在星期六，因星期日可作緩衝，更詭異係梁振英以官員文件未準備好為由，取消今日行政會議例會，更加係「堆沙包」行為。
例會之叫例會，係不論有冇文件，均會召開，務虛討論亦可，最多就開半個鐘散會。取消例會只有一個原因，就係避免其他行會成員提出討論商交所事件，而梁振英亦可避開對事件作公開回應。如此小心部署，步步為營，梁目的係要與張完全切割，就如當日與劉夢熊切割一樣。
商交所是否政治黑洞？是否涉及梁營金主活動、選舉政治獻金、官商利益輸送？每個議員心中都有此疑問，可惜以梁之蠱惑，非要現場斷正，否則必誓神劈願表示唔知情。目前政商界已懷疑張震遠在商交所只是台前「泊車仔」，否則佢點可能有5億元去輸，若果佢係「代客泊車」，咁真正「客人」究竟係邊個？而幫手睇場又係邊個？
梁振英應明白商交所釘牌事件，乃繼劉夢熊自殺式炸彈後，另一個具政治殺傷力之炸彈，一旦處理不善，分分鐘會上身炸死自己，昔日為梁執行獵殺唐英年大計之兩員大將，一位劉夢熊已墊屍底，究竟下一個會否就係張震遠？梁乃不折不扣之「毒男宅男」，孤獨到冇朋友，若由執法機構送張一程，咁就真係夠晒戲劇性。
本來今日行會例會後記者只要問幾個簡單問題，已足以corner梁振英，包括佢何時知悉張有財困？有否與有關官員或監管機構主管商量過？睇睇佢夠唔夠膽講大話。
佢以為好醒，取消周二例會，或可buy time，但要淡化事件，令傳媒及議員釋除疑慮，難矣！
跟梁振英搵食，真係要打醒十二分精神！
添馬男