早前去了某個教會的佈道會，查實我冇宗教信仰，但偶爾都會在朋友「咬住唔放」的誠意打動下，應邀出入教堂，聽吓耶穌，我意思係「道理」。今次講員係知名的傳媒人李先生，整體內容左入右出，幾乎不留痕迹，但全晚有一段說話令我印象特別深刻，亦有所思。
李先生喺佈道會講到，世上所有重要嘅宗教，一定會講到死後何去何從呢個問題。他認為人對死亡如何解讀，正好決定了其人將活出一個怎樣的人生。
日本人多信奉佛教淨土宗，認為所有人死後都可以去西方極樂淨土，得到真正的平靜，所以日本人唔怕死亡，且要活得像櫻花一樣燦爛。印度教徒相信輪迴，覺得人生要不斷接受苦難，要通過修行，先可以喺階級制度上得到攀升。基督徒（天主教徒亦如是）相信所有人死後都要面對神的審判，罪得赦免可以上天堂，唔係就要落地獄，所以教眾都敬畏神，常懷感恩，生活要謙卑。
點都要定條底線
正正因為殊途並不同歸，所以你有如何的信仰，你便有如何的生命。其實聽完一大輪，簡單來講，就係當今日我去咗間餐廳（自問嗰間多數係茶餐廳）食飯，究竟食完飯有冇夥計（神）會同我計數？呢張單又使唔使埋？要埋又點埋法？呢幾條問題嘅答案絕對會影響咗呢餐飯會叫乜嘢食，同點食法。
對於有信仰嘅人，喺呢間餐廳一定會細挑慢選，同食相有品，因佢知道張單要埋，責任要負，甚至轉頭有可能會再返嚟呢間餐廳食過。相反，認為呢餐唔使計數，食完就走、後會無期嘅人，肯定會亂叫喪食，今朝有酒今朝醉，總之就係擺明「𡁻完鬆」。
如果人生抱持嘅係呢種人生觀，咁做人一定會肆無忌憚，不擇手段，因為咁樣方可以做到個人利益最大化，所以「賺盡」亦不過其中一種表現。而我認識的一位教友亦曾借聖經所載三個家僕「種金」的故事，說明一己錙銖必較、涓滴不漏的營商手法，不過是奉行上帝旨意，立志要做好一個「忠心良善」的僕人。想想有幾位虔誠見稱的地產巨富，還有我們縮骨貪盡的曾特，不無道理。
雖則舉頭三尺不見神靈，惟自問唔係、實際亦唔敢做一個「𡁻完鬆」嘅人。雖然我唔肯定張單使唔使埋，更不知道明天、後天或往後的任何一天會唔會再返嚟呢度，但我始終幫襯咗呢間餐廳成40幾年，食咗咁耐，感情既深，亦越來越鍾意間餐廳，當然仲有其他同樣來來往往的食客。
總之，好嘢我一定會照食，酒亦會叫，不過點都會定條底線畀自己，最緊要有餐桌禮儀，尊重自己，食物且推己及人。總不成我請客（其實係自用），人付鈔，自己張單，點都冇理由要其他人幫我埋。
盧先亞