朋友說最近睇電視睇到介紹實用率高的屋苑，其中1981年入伙喺界限街的碧華花園，實用率達92%，堪稱實用王。咁發展商係邊間？「你估唔到㗎喇，係長實！」曾幾何時長實都算是童叟無欺的商家，點解30年後今日長實同樣喺九龍塘的豪宅樓盤，卻被人踢爆天台無圍欄、房門得半截的奇則呢？
市場最近漸漸不再把長和系每一個決定都入誠哥數，反而將矛頭直指小超李澤鉅。小超以捽數叻聞名於天下，其首個成名作長建（1038）就係以保守策略、靠電能（006）的強勁派息，用平錢去英國等地買低風險、有保證回報的資產，一點一滴累積盈利，策略贏得投資者認同。憑藉長建食糊，小超多年前得以鞏固在集團上位的根基，故小超如今對蠅頭小利仍如斯敏感，可能都有啲影響。
長和早前放風誠哥今日破天荒股東會後唔見記者。與其說是避風頭，海迪覺得佢更擔心嘅係如未能和阿仔統一口徑，會動搖小超嘅管治威信，那才真正大鑊。誠哥三月時才講過每日都會捫心自問「對唔對得住香港人」，但對比佢𠵱家對集團越發賺盡的作風卻隻眼開隻眼閉，呢句話真係好諷刺。
海迪