特首CY身邊大紅人兼商交所主席張震遠近日紅爆，佢一日唔公開交代財務狀況，應該會繼續成為傳媒追訪對象，成個金融界都估緊，張震遠究竟錢從何來？一方面可以億億聲咁燒錢，另一方面卻要問立法會前議員詹培忠借來區區800萬元，孖屐笑指，金勞詹頓成「Lender of Last Resort」，地位拍得住央行。
俄鋁歐柏嘉下月來港
據聞商交所資產同收入有限，冇乜銀行夠膽借錢畀佢，主要靠股東注資。孖屐打趣話，張震遠可能係借無可借，先至走去搵金勞詹，經濟學有樣嘢叫做Lender of Last Resort，通常指央行。即係當銀行好唔掂，周圍都撲唔到水，最後走去搵央行打救。金勞詹就係咁即刻升呢。
講開股東注資，商交所其中一個股東係俄鋁（486）母公司、俄羅斯富豪歐柏嘉旗下EN+集團，EN+早於2010年中認購商交所一成股份，成為始創股東。舊年3月俄鋁發生股東爭拗，張震遠走馬上任成為俄鋁主席，10月辭任主席，保留獨董一職，可見歐柏嘉同張震遠有啲交情。
咁啱今年俄鋁贊助本港首屆俄羅斯電影節，聽講歐柏嘉6月14號會專誠來港睇開幕電影《冰之驕子》，近日商交所因財困停止交易，唔知張震遠到時會唔會約見歐柏嘉傾傾注資大計呢？
李華華
mailto:[email protected]