抗疫10周年，香港再次宣佈成為疫埠，人人中鴨毒。巨鴨變烚熟生筋入廠大修，香港人頓時囉囉攣，日日上facebook做望鴨石，追蹤巨鴨動向。呢期疫情開始蔓延全球，內地、泰國甚至加拿大陸續呈報發現巨鴨，經過八方快速目測，初步證實全部都係山寨鴨。
大家只要上Instagram或者微博搜尋Rubber Duck，就會搵到世界各地嘅山寨鴨，泰國某公園水池、加拿大露天夜市，甚至內地商場門口都驚現巨鴨，表情大細不一，不過共同特徵都係黃色、眼仔睩睩、肥，同埋俾一大班鴨迷圍住瘋狂影相。
其中加拿大溫哥華出現嘅Rubber Duck，原來有名堂，叫Moby Duck，係今年列治文夜市（Richmond Night Market）吉祥物，高15米，肥大身形同香港嗰隻有得揮，今個月1號出世。呢個夜市係當地華人創辦，舊年有成80萬人參加，今年有巨鴨坐鎮，大會估計入場人數會創新高。同場仲有12隻真人高嘅吉祥鴨仔，謀殺當地人唔少菲林。最霸氣係西安巨鴨，有人喺微博話「香港大鴨倒下了後，一隻迷你黃鴨在西安站起來」。
巨鴨之父唔太Care
海港城發言人話，有收到溫哥華驚現巨鴨消息，巨鴨之父Florentijn Hofman都有聽聞，但係冇諗過版權問題，最緊要係Rubber Duck嚟咗香港之後，帶畀大家開心；不過Hofman嘅創作意念係鴨在水中，冇預佢會行上岸。
mailto:[email protected]