受惠美股破頂及內地股市三連升，港股佛誕小休後再度發力勁升410點，更一度突破23500熊證重倉區。今年初大市一度逼近24000後回落，23500至23900區間有唔少散戶被綁，形成密集蟹貨區。強勢股如頁岩氣、內地電力股逆市下跌，反映唔少人寧願先食糊，好友要攻破呢個「蟹竇」絕非易事。
日圓跌跌不休，主要產銷金屬沖壓模具及塑膠注塑模具嘅億和（838），有喺日本入口原材料，成為今次日圓跌浪其中一個贏家。集團去年賺7,089萬銀，按年減少66%，主要因為喺武漢興建新生產基地拓展汽車零部件製造業務，令資本開支大增，預期新廠年中投產，加上去年基數低，今年盈利肯定大爆發。事實上，集團收入按年增長兩成至23.7億銀，已擺脫日本地震及泰國水災陰霾，配合成本下跌，毛利率有望重拾升軌。
億和造旗已屆尾聲，隨時展開升浪，現價1.46元先買一注，突破1.57元再加碼，中線見二字頭難度不大。
唐牛