長和系大公關事先張揚，主席李嘉誠今年開完長實（001）、和黃（013）股東會就鬆人，唔見傳媒，即係唔會為雍澄軒交易被證監會叫停、碼頭工潮等負面新聞作回應。小超人李澤鉅（圖）噚日出席長江生科（775）、電能實業（006）同長建（1038）股東會亦從秘道出入，唔見影。
股東嘆上錯賊船
唔見傳媒唔等於小超人心情差。有長科小股東話，小超人開股東會時心情勁靚，估計同今年冇人插佢有關。言下之意，以前好多人插佢？又係嘅，長科02年以2蚊上市，噚日收7毫，唔少股東坐足11年艇，仲話既然上咗賊船，一於同佢鬥長命。咁點解當初要認購呢？一位小股東就話「因為信長江（長實）、信李嘉誠囉」，可惜「長江好多隻都變衰咗」。
另一位睇住李嘉誠入主電能（前稱港燈）嘅電能老股東就話幾滿意公司表現，佢由4蚊揸到家陣80蚊，靠食息養老喎。小股東感受咁唔同，呢個係咪幾十年前同後嘅分別呢？