講多單滙控（005）料，曾經係2010年滙控宮廷政變主角之一，08年起擔任獅子行獨立非執董嘅約翰桑頓（John Thornton），將於本周五集團股東大會上退選董事，同時辭任滙豐北美主席。
桑頓呢個名字，就咁聽頗陌生，但一提起2010年滙控世紀高層大地震，外界都會醒番起，事關英國媒體一度傳佢呢位前高盛人，可能係滙控近百五年嚟，首位唔係出自獅子體系嘅非執行主席。
約翰桑頓曾爭做主席
宮廷巨變由集團前主席葛霖當年年中棄商從政而起，此後近一個月，英報多次傳出，桑頓同當時CEO紀勤爭做主席，最激情節係英國《金融時報》，爆出董事會互片內幕，指紀勤要脅若未能升任主席將會劈炮。
雖然獅子行否認報道，但一輪權鬥後，最終由財務董事范智廉走馬上任成為主席，炒房老頂歐智華接任CEO，紀勤由威脅唔撈變成光榮引退，宮廷政變就此落幕。