民建聯元秋早前學拉布議員喺議事堂東拉西扯，畀「同黨」黑哨曾叫佢虛心啲留意其他議員發言，元秋受挫後揚言要背熟《議事規則》裝備自己，增強戰鬥力。噚日進入拉布第N日，元秋唔知係咪見悶，當黑哨同長毛過招話要對方整理吓發言，唔使就逐個政府部門發言，元秋又起身搶鏡，提規程問題。
元秋隨即讀出《議事規則》68（3）：「辯論的範圍只限於需要撥款服務的政策，而非任何子目或分目的詳情……」話部份議員已經講咗入分目喇。不過，佢慷慨發言提醒主席後，黑哨不但唔領情，直頭當佢冇到，應都唔應，搞到元秋十分冇癮。