咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
今季英超曲終人散，相信好多人記得加里夫巴利同尹佩斯呢啲搶鏡球星，但講到最令人失望，可能一時醒唔起有邊個；咁就等小弟列幾個出嚟，畀大家一齊鞭策吓佢哋，希望佢哋下季有進步。
先講阿仙奴，阿仙奴陣中有個球員幾令人失望，或者有球迷已經開始唔記得佢，佢就係隊長華美倫。佢喺季初被視為兵工廠的擎天柱，好多廠迷都擔心佢會走人，但一年後，華隊長已經變成板櫈常客，正選位俾哥迪奧拿好欣賞嘅哥斯尼取代。
車路士有邊個令人失望？費蘭度托利斯？由於對佢都冇希望，所以亦冇失望，反而艾殊利高爾開始年紀大，冇之前幾季咁跑得，車路士嚟緊要幫佢搵接班人。利物浦方面亦有個球員令我嘆息，就係中場祖阿倫。上季佢係史雲斯打得唔錯，所以羅渣士先帶埋佢過檔，今季初都委以重任，但佢可能做慣中場核心，唔知點同謝拉特夾，防守又唔夠硬淨，所以季中已被盧卡斯取代，退居冷板。曼城方面就以大衛施華最失色，冇上季咁sharp，中堅高柏尼都係，相信同傷患有關。
講到煞科日最令人失望嘅，就係費格遜。雖然呢場係告別戰，本質係開心事，但由81分鐘到86分鐘失到3球，俾人追到5:5，小弟所認識嘅費格遜應該黑晒臉，賽後開行吹風機「省」班球員，但佢最後都冇咁做；希望莫耶斯可以代爵爺鬧爆班球員啦。文：咖喱