蘋機會：渡輪30倍遠攝　醉步影維港

有點暈！不是喝醉了，而是站在渡輪上拍維港靚景！以為長炮搭腳架是最好，點知Sony僅一部輕量級HX50V，立即KO這位對手！30倍變焦加上強化版影像穩定功能，嘗試在渡輪航行期間，Zoom盡影對岸鐘樓時針，效果不知幾清。

記者：陳國輝　攝影：林栢鈞

模特兒：Cherry@Unique

清拍對岸鐘樓

去旅遊，拎住支長炮四圍獵影山光水色，當然係賞心樂事！但要背負幾十磅攝影架生上山落斜，卻絕非人人頂得順！近年流行長炮機仔，好似今日介紹的HX50V，加埋電池重量僅272g，但居然具備30倍光學變焦、2,040萬像素CMOS鏡頭，方便過孭長炮加大機多多聲啦！
應付遠攝問題，不單要靠長焦距鏡頭，手也要夠定！難道妹仔大過主人婆，專登為機仔孭支腳架？好彩，HX50V內置了光學防震系統，提供防震補償，能減低手持拍攝造成的鬆郁矇現象。Cherry實試在渡海小輪影過對面海，雖然當日風浪唔算大，但船身仍搖晃不停，手持遠攝兩公里對岸，居然影到鐘樓的指針，甚至睇到住宅窗邊的環境，沒錯有點Noise，但可接受。

Zoom到盡鏡頭未算好長，仍可單手拎住玩。

Sony說防震能力較上代HX200V高兩倍。

加熱靴插燈

比較前朝的HX200V及HX30V，HX50V另一令人另眼相看的亮點，是終於加入具備多介面的熱靴，毋須轉換器，便可直插不同牌子的閃燈，又或者電子觀景器，睇落更大方，甚至有機會吸納唔同玩家。
軟件方面，它繼續玩即時過相的WiFi功能，又有GPS隨時定位，加埋佢玩齊三款全景相效果，對一般旅遊人士，呢款旅攝機仔都算是合格有餘。