李思欣早排收到老公范振鋒送嘅白色豐田座駕，點知噚日佢揸車去柴灣做嘢，就唔小心發生交通意外，思欣嘅座駕同一架小巴碰撞，思欣稍為定神就報警求助，警察馬上嚟咗調停。思欣噚日驚魂甫定，就將架車損毀嘅相貼微博，佢好肉赤咁呻：「去影相點知撞車，真大鑊！好彩冇受傷，但架車就……」
「撞歪啲就死咗」
思欣因為趕住做嘢，意外後泊咗架車喺停車場就馬上去開工，佢老公范振鋒飛的過嚟救駕，老婆受驚，范振鋒梗係緊張又擔心，佢到場即刻搭膊呵番思欣，始終車毀人冇傷，係不幸中大幸。思欣檢查架車傷勢，發現除咗司機位倒後鏡撞到甩咗，車門花咗，前輪車軸都有啲歪，佢心痛到扁晒嘴，范振鋒後來安排拎架車去車房整。
馮仁昭噚日打電話畀思欣，佢憶述意外仲心慌慌話：「我當時慢駛搵門牌，點知就俾小巴撞咗埋嚟，意外後好多途人圍觀，我𠵱家越諗越驚，撞歪啲就死咗。」思欣意外後都有向媽咪報平安，佢仲話今次冇事遲啲要去還神。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！