朋友阿彥有金融才俊唔做，走去揸巴士，可能有人覺得佢傻仔，但佢目標清晰，自己又開心，何樂而不為？
一句「人生咁樣豪一次真係好抵好『型棍』。」的確，有勇氣打夢想牌，堅係「型棍」。
不過，有夢想唔去追嘅亦大有人在，其實唔少後生仔連自己想點都冇諗過。早兩日菲菲同從事服務業嘅前輩傾開，佢話新一代的確有批人好「地獄」，見工時就遇到唔少「奇珍」，全程頭耷耷唔出聲，問三句先答一句都唔算奇聞，仲有更誇張嘅例子，有後生仔應徵售貨員，個前輩問點佢點解唔做侍應，佢竟然話「呢行冇得做喇，因為遲啲會轉晒做機械人。」
最估佢唔到嘅係，原來有好多人係會帶埋阿媽去見工！廿幾歲人將見工當成家長日，到底佢知唔知自己做緊乜？
阿彥係的確值得人羡慕，除咗因為佢有勇氣去實現夢想外，單係搵到自己的夢已經好難得。事關現實中，好多後生仔都係一條每日浮游於太虛，冇夢想嘅鹹魚。
Fifi
本欄逢周二、四刊出