政制及內地事務局向來都係北京話事，所以無論邊個做局長，回應都係重重複複咁播帶，噚日立法會政制事務委員會討論下屆區議會選舉嘅議席數目問題，民主黨劉慧卿問當局係咪應該將個選區劃大啲，等區議員認受性高啲，唔好等區議員流於關注巴士服務班次或者通渠等瑣碎事。
政制局長譚志源就當然繼續打官腔啦，來來去去都係「聽意見、聽正反意見、聽各方面意見」等傀儡式回應，搞到卿姐真係火滾，即時柴九上身，高呼「你哋聽咗十幾廿年嘞！人生有幾多十幾廿年呀！」卿姐發嬲發到用埋電視劇對白，但係sorry，當局意見接受，態度照舊。