西甲雖然仲未打完，但係巴塞隆拿周日主場半力以2:1擊敗華拉度列後，一班球員帶晒一家大細上場慶祝，好似呢一場係最後一戰咁！球王美斯雖然冇落場，但係就帶埋阿仔堤亞高見球迷。英超煞科日，一班球員帶同家人多謝球迷支持，氣氛極度溫馨。
巴塞提早奪標，亦都搞埋勝利巡遊，剩低嘅比賽已經係例行公事。周日呢一場對華拉度列，球隊半力出戰靠柏度洛迪古斯同對方後衞馬斯華利安迪嘅「烏龍球」，以2:1擊敗對手。賽後一班球員同家人上球場，再次拎個盃出嚟影相。
法比仔帶初生囡囡慶祝
當中只係喺網上見過美斯囝囝堤亞高，仲第一次現身公開場面，同球迷見面。堤亞高肥嘟嘟勁得意搶晒鏡，而法比加斯出世冇耐嘅囡囡莉婭都不遑多讓！
另一邊廂英超同日都打煞科戰，利物浦擊敗昆士柏流浪之後，紅軍眾將同家人喺晏菲路感謝球迷一整季嘅支持；有波入嘅菲臘比古天奴，仲帶埋老婆安妮出嚟，同球迷見見面。兩個人合照笑得好甜，恩愛程度爆燈。
至於熱刺贏波但係失落歐聯，球員們當然灰啦，不過都要去謝幕。陣中中場丹普西，相信都幾唔開心，不過見番老婆同3個仔女，都叫有番啲笑容。咁又係，無論足球有幾重要，點都比唔上屋企人嘅！
