黑哨曾喺立法會剪布，民建聯「低調黨員」、中文大學校友評議會主席陳志新又學「同黨」剪布。有中大校友透露，陳主席建議修改評議會會章，以後只要三分二常委同意，就可將議案押後討論，避免會議過份冗長。萬一會員大會通過動議，本來弱勢嘅改革派連發言都可以慳番。
除咗引入剪布機制，獨立媒體報道，有校友動議將評議會改名做「議會」，原因竟然係呢幾年太多爭拗。校友葉蔭聰喺網上留言話，民主國家嘅議會都有監察同立法功能，如果想名正言順做橡皮圖章，不如改名叫「校友代表大會」或者「校友協商會議」啦。改革派開始吹雞，呼朋喚友參加下個月22號嘅會員大會。