【灣仔→赤鱲角機場】韓國當紅組合BIGBANG隊長G-DRAGON（GD）噚日凌晨離港，臨走前佢同助手先嘆避風塘炒蟹，前晚9點鐘左右，GD一行人去咗灣仔駱克道幫襯橋底辣蟹同炒麵，門口嘅粉絲由最初七、八個增加到差唔多有20人。食到11點，GD準備離開，當中一名韓國保鑣先行出嚟打點，當GD步出食店時，嗰名韓國保鑣一夫當關，一手粗暴推開粉絲、另一手遮擋記者影相，GD亦唔再親民，就算粉絲叫破喉嚨，佢都係頭耷耷上七人車。GD架車一離開，後面就有成七架粉絲客貨車跟住佢。
小朋友送機
GD架七人車直駛到機場，二百名粉絲已經在場準備送機，機場保安亦一早喺度戒備，現場仲有幾歲小朋友寧願送偶像機都唔瞓覺。工作人員先落車幫GD登機作準備，擾攘15分鐘後，GD喺保安包圍下落車，粉絲大呼「I love you」，但GD似乎心情一般，即使粉絲叫到拆天，佢都只係低頭快步走，其間只係低頭向粉絲揮手四次。此外，周柏豪噚日喺荃灣出席活動被問到有指跟時裝界女友Stephanie去睇GD演唱會，佢承認一齊捧場，但就係一大班朋友去睇。
採訪：藍文浩、徐錦池
攝影：葉君海、李志明
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！