滙控（005）上星期透露新一輪裁員大計，預計喺2016年前，全球再縮減最多1.4萬個職位。噚日就連小股東都忍唔住，喺非正式股東會上質問CEO歐智華點解不斷裁員，擔心影響員工士氣，歐智華竟然答話，集團裁員係為咗小股東利益！
歐智華前年上場之後，就大刀闊斧咁精簡集團架構，2011年9月仲宣佈在港削減3,000個職位。佢噚日話，一直都好慎重咁處理裁員問題，叫小股東唔好忘記，慳成本先可以增加派息呢個硬道理。
稱港員工總數唔會跌
歐智華嘅邏輯係，由於全球央行放水，加上經濟好弱，所以集團收入冇乜增長空間。既然係咁，只好靠削減成本嚟推高盈利。最後佢又安撫大家，話2011年至今，滙控在港只係減少咗1,000個職位，少過原本公佈嘅3,000個，香港係冇乜裁員壓力，員工總數唔會跌咁話。