NBA熱火前鋒獲迪（D-Wade）雖然正忙於準備東岸決賽對溜馬，但係並冇因此冷落球迷。日前佢就送咗個驚喜畀一位叫Nicole Muxo嘅女高中生；喺後者幾次邀請自己去高中舞會不果之後，閃電俠突然喺party現身，令Nicole受寵若驚。
話說Nicole喺4月中擺咗條片上YouTube，邀請D-Wade去佢高中舞會，不過當時獲迪正為季後賽做準備，冇覆實自己去唔去到。不過，呢位女高中生冇因為咁而放棄，不時都會問吓偶像，可惜獲迪一直都冇回覆，搞到佢最後只可以另約男伴。
應邀去舞會兼送吻
之但係，原來學校早有準備，想送個驚喜畀Nicole，暗地裏搵咗獲迪公關，安排呢位熱火球星出席上周六嘅舞會。舞會期間，校方突然叫Nicole上台，同獲迪通電話；D-Wade問呢位小球迷玩得高唔高興，之後就拎住束玫瑰花入場！Nicole即時開心到雙手掩面，好似唔信眼前嗰位真係自己偶像咁。
獲迪到場之後，同Nicole一齊跳舞、影相，玩得勁開心。不過，閃電俠第二日要練波，所以冇逗留太耐；走嗰時佢問Nicole男伴介唔介意，仲搞笑話自己只係後備。D-Wade最後仲錫咗Nicole面頰一啖，盡顯男士風度。Nicole話永遠唔會忘記呢晚嘅一切，而獲迪就將同Nicole嘅合照放上facebook，仲話：「要有遠大夢想，因為你唔知將來會發生咩事！」
