上周五有報道話國家主席習近平親自領軍，搞一個突破性嘅經濟改革計劃，但報道又暗示唔會大搞貨幣刺激措施，地方政府又唔靠賣地去支持未來開支，咁究竟有乜法子推動經濟呢？
內地經濟政策一向由總理李克強、政治局常委張高麗處理，晉佳身邊熟悉國情嘅朋友都覺得單消息怪怪哋，擔心一旦屬實可能牽涉政治角力，未必係好事。不過，唔理係咪虛火，淨係聽到習近平三個字，資金就掃高A股1.4%，相信今日港股都有條件高開。
雖然習近平領軍救經濟嘅消息未必十分可信，但係睇得出未來中央救經濟，都離唔開上述嘅思路，原因係內地樓市、地方債泡沫的確有爆煲風險，加上有中央打貪嘅意志，往後日子刺激經濟一定要避重就輕。
一個唔靠信貸增長推動經濟嘅刺激計劃，又要唔刺激樓價升溫，晉佳暫時只係諗到中央會出招刺激內地人減少儲蓄、多啲投資、多啲消費，如果真係動用人民嘅力量，從投資者角度睇，相信就要從金融、消費類股份埋手。
跌見六元可吸納
金融股方面，一方面要打擊唔規範嘅金融領域，例如民間借貸，但又要引導資金從正確渠道投資，一批已經反映不利因素，但仲未反映利好政策嘅券商股、保險股應該秤先，至於接近民生嘅消費股、國產汽車股、航空股亦會有着數，選擇都唔少，但係內地𠵱家興打貪，高端消費股未必係最受惠嗰個環節。
消費股當中，例如服裝、波鞋股，行業競爭太大，未必買得落手，所以寧願吼汽車、航空股，中國國航（753）面對油價長期窄幅上落，燃油成本威脅唔大，亦可以受惠人民幣升值擴大利潤率，近排又大手訂購飛機，未來可以搶佔市佔率，睇番近年內地航空客運量仍然穩中有升，相信國航應該係唔錯嘅選擇。
近排國航股價喺6至7蚊徘徊，晉佳覺得挨近7蚊去買可能風險較大，買嚟中線持有，最好等回到6蚊先買。
晉佳
本欄逢周一、三及五刊出