曾簽約中國星、被譽為張栢芝接班人嘅內地女星閻清，噚日同陳惠敏個仔Kif喺尖沙嘴洲際酒店擺結婚喜酒。30歲嘅閻清嚟香港發展麻麻，但就識咗陳惠敏個仔Kif，仲好快組織小家庭生咗個囝囝，噚日喺洲際擺酒，楊千嬅同彭浩翔都有嚟，千嬅話因同閻清喺北京拍《春嬌與志明》時識嘅，之前私人派對都同佢個仔影過相。
新老爺陳惠敏噚日西裝骨骨、笑容滿面，佢話飲新抱茶嗰一刻有啲感動，問到對囝囝、新抱有乜教誨，佢話：「唔使啦，都大個仔，做阿爸嘅唔使講咁多啦！」佢又講笑話送咗個心畀囝囝，又開心自爆閻清已經送咗個孫畀佢，家陣四個月，今次擺酒可謂雙喜臨門。
柏文Jeana同出席
做戥穿石嘅張柏文，透露噚日朝接新娘時，要食整到似屎嘅曲奇餅，最後畀咗$99,999開門利是接到新娘，柏文仲話佢係一對新人嘅媒人㖭：「嗰次陳小春擺酒，新郎見到閻清話好靚，我後尾介紹佢哋識。」至於之前傳佢同女友Jeana（何佩瑜）分手，柏文話只係冷戰緊，而Jeana都有同佢一齊嚟飲。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！