緊接無綫「神劇」《神探高倫布》出街嘅《情越海岸線》，總算為無綫挽回啲面子，噚日監製梁材遠率領一班演員去荃灣做宣傳時，公佈平均有26、27點收視（約167至173萬觀眾），贏咗平均收視得21點（約135萬觀眾）嘅重頭劇《金枝慾孽貳》，有呢個成績，輕鬆易明嘅劇情，同埋成班養眼嘅演員有關，之前有劉俐同李綺雯性感拍宣傳片，噚日就有朱璇晒腿謝眾。
噚日陳展鵬、李詩韻同黃浩然都有做宣傳，不過傳同陳豪就快結婚嘅陳茵媺就因為放假而缺席。配合番劇情，演員喺台上玩釣魚遊戲，又即場喺平安包上吸印派畀觀眾，吸印時都戴晒手套，夠晒衞生。
對於收視不俗，展鵬話：「收視OK都OK，作為演員收視唔重要。」話唔重要啫，但冇人睇做演員都唔開心啦，展鵬就話：「無綫每年咁多製作，收視係外界覺得重要，藝人只要做好本份，其他嘢預料唔到，最緊要觀眾睇得開心。」
詩韻睇咀戲尷尬
觀眾睇得開心，當然包括展鵬同詩韻嘅激咀戲啦！講到呢場戲，詩韻話：「第一集我同家姐、菲傭坐定定睇，但出場我就同展鵬激咀碌落梳化，搞到好尷尬，即刻叫菲傭斟橙汁使開佢，家姐都話好激！」詩韻話佢入行拍過廿幾套劇，最親熱都係同展鵬、鄭嘉穎，因為錫得少，所以好緊張。另佢喺劇中同前男友鄧健泓做舊情人，監製有問過佢有冇覺得唔舒服，詩韻坦言：「我哋係專業演員，唔會面左左，唔會尷尬。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！