台灣著名綜藝節目《康熙來了》喺兩岸三地有好多觀眾，近日冇端端引起內地網民熱烈討論，不過唔係討論節目內容，而係片頭值入咗大量旺旺（151）吉祥物旺仔。大大隻旺仔喺20秒嘅片頭當中，不斷喺畫面中穿梭，起碼閃身10次，想留意唔到都好難。
只針對內地觀眾
本港節目不時有大量值入廣告，例如喺劇集中放喺飯枱上嘅紙巾盒、喺主角家中周圍擺嘅汽水零食等等，有啲廣告logo亦會時不時喺節目中閃過，但喺片頭不斷有隻品牌吉祥物出現真係比較少見。
播放《康熙來了》嘅台灣中天電視，早幾年俾旺旺董事長蔡衍明買咗，旺仔現身喺呢個咁出名嘅節目一啲都唔奇。奇就奇在，好似只係經內地騰訊頻道網上播放嘅《康熙》，片頭先見到旺仔，呢條宣傳橋似乎只喺內地適用。