無綫節目《玩嘢王》大收，觀眾個個星期六都等緊邊位明星被玩；其實英格蘭球會玩嘢程度更加勁，史篤城唔知邊個球員送咗個豬頭畀前鋒堅韋尼鍾斯（K鍾），點知玩出火，搞到當事人怒爆格連韋倫座駕嘅擋風玻璃，球會將展開調查，誓要搵出豬頭真兇。
史篤城「豬頭惡作劇」風波越搞越大，單嘢上周五曝光，「受害人」K鍾發現佢喺練習場嘅更衣室儲物櫃出現豬頭，由於K鍾信仰嘅宗教唔畀食豬，所以嬲到爆。愛爾蘭中場格連韋倫一向係史篤城整蠱專家，所以K鍾認定今次係佢所為，結果走去怒爆格連韋倫座駕嘅擋風玻璃。
冤枉韋倫事後道歉
不過今次K鍾就怪錯人，韋倫冇份參與今次事件，K鍾冷靜後透過Twitter向韋倫道歉，兼賠番維修費畀韋倫，仲唔希望傳媒將事件上綱到種族問題。風頭火勢，真兇𠵱家都未肯蒲頭，史篤城亦要嚴肅處理；會方發表聲明，會進行內部調查，所有涉及任何不當行為嘅人，都會受到紀律處分。
英國《太陽報》就乘機抽水，列出英超歷來大整蠱事件（見附表），豬頭固然有份，最經典係曼聯中場畢特，夠膽搞「大佬輩」嘅舒米高，趁舒米高沖涼之際，用熱水壺辣佢pat pat，史譚回憶時講：「舒米高被整蠱後， 追足畢特幾條街；我哋一班隊友就笑到流眼淚。」史篤城兵早前整蠱奧雲架平治，亦都入選10大。