熱衷推廣冰球運動嘅合和實業（054）太子爺胡文新（Thomas），喺大埔搵緊地起冰球館，唔知係咪瘦田無人耕，耕開有人爭，聽聞有加拿大商會成員正醞釀在港增添冰上運動設施。
成功爭取港隊玩世錦賽
加拿大商會上周六在港舉行冰球之夜，有參與者話，商會認為冰球對於加拿大人相當具代表性，香港亦多人玩，如果要繼續發展，就要有新嘅冰上運動設施。
據聞胡文新知道呢單嘢之後，大為緊張，擔心商會同佢一齊向政府申請用地，唔知政府有冇咁多地，但由於對方處於醞釀階段，所以佢都未知有乜對策。
不過，Thomas上星期喺瑞典以國際冰球聯合會副會長身份開會，就成功為香港隊爭取明年參加世錦賽，算係為提升香港冰球水平行前一小步。辦完私事，Thomas呢個星期會留港，為合和分拆地產業務一事主持大局。