特首CY身邊大紅人張震遠搞咗逾5年嘅香港商品交易所，突然交番個牌畀證監會，宣佈停止交易，不其然令人諗起新界鄉議局主席劉皇發今年初為香港喺車公廟求得嘅95籤下籤，呢支籤用喺張震遠搞商交所呢單嘢身上似乎仲啱。
開業兩年 虎頭蛇尾
籤文話「駟馬高車出遠途，今朝赤腳返回廬，莫非不第人還井，亦似經營乏本歸」。
猶記得張震遠喺2008年中，高調宣佈成立商交所，當時得到財爺曾俊華透過錄影訪問表示支持，似乎得到政府祝福，逼到港交所（388）前主席夏佳理即日急急出嚟回應，話市場有競爭係好事云云。情況十足十籤文頭一句咁，係威係勢。
申請咗三年，商交所喺2011年5月18號先至低調開業，期間雖然不停宣佈有新嘅經紀會員加入，但係無助提高交投量，更遑論增加收入。商交所咁多年不斷億億聲咁燒錢，莫講話賺錢無期，連本都收唔番，上周六啱啱係開業兩周年就宣佈停止交易，咪就係應咗籤文最後嗰句囉。
籤文解作「宜慎小人，凡事不利」，邊個係小人冇人知，但凡事不利應該都幾真。真係好想問吓張震遠，佢計劃搞商交所之前有冇走去車公廟求籤呢？
李華華
mailto:[email protected]