前輩教落，揀股要睇基本因素，幾時買就要睇圖。不過，睇圖有時會成為投資的最大敵人。本欄4月2日推介金山軟件（3888），當時7.14元，有戰友望圖後問「半年升過一倍，好高喇喎，仲買？」上周四升到9.51元，坐個半月賺33%，其間冇震倉，唔使食驚風散，點都好過炒不知名細價股。
畏高是人的天性，但炒股就要克服。一隻股形成上升趨勢總有原因，代表有資金持續吸納，背後九成有盈利因素支持，舜宇（2382）如是，信利（732）亦然。今日再推介金山軟件，原因有兩個：一、市場氣氛好轉；二、騰訊（700）盈利爆升。
全球不停量寬，熱錢明顯流向科網股，浪潮（596）呢類九線網絡股都炒起。金山盈利一流，配合資金流入，值得較高估值。要提高到幾多呢？魏力會以騰訊作參考。彭博綜合預測，騰訊今年PE為26倍，金山軟件係17倍。睇齊26倍的話可見13.70元，家陣買仲有44%水位。
魏力
http://www.facebook.com/2012jason
本欄逢周一、二、四、五刊出