上星期三特區政府公佈，廣播處長鄧忍光升官，成為首長級官員D6級，雖然唔夠同班同學袁國強司長咁高級，但在公務員AO系統，升級快過人，叻仔也。一位港台員工話俾左丁山聽，鄧忍光叻在識走位，願意勇闖龍潭，為特區政府上刀山、下油鍋，單人匹馬單挑廣播道群英，行黑地氈昂然入內，俾電台工會大罵特罵咩，唾面自乾，總之忍得就忍，果然百忍成金，入台一年多啲。就升正做D6，所以話：做官唔夠厚面皮，不如不做。
但廣播處處長只係D5職位，搵位D6高官做，嘥啲噃，故此港台員工話：「鄧先生會好快就走嘅嘞，D6做廣播處長，高得滯，我認為佢必然調去其他部門，例如漁農署長就係D6，但既然咁打得，最有可能調番政府總部做政策局副秘書長，幾年後做D8。」
如果一如所料，鄧忍光好快鬆人，邊位AO入港台做處長？以前傅小慧與港台員工和洽相處，好唔識做，到依家都不過係D3級，其他AO看在心裏，知所抉擇，想升官快捷啲，一於爭住入港台做處長，跟住鄧忍光條路行，咁就會極速升D6嘅嘞！與白髮魔女搵交嗌，再搵一個施永遠祭旗，心口寫個忍字咪得囉。
兩星期前在飯局碰到一位退休港台高層。原來佢五十五歲已經退休，過冷河之後，重出江湖，十分生猛，問佢點解咁早退休？佢話：「好彩啫，如果唔係，碰上鄧先生呢啲外行人教我做節目，咪要嘔血！」港台一啲節目係做得好專業嘅，唔到你唔服，好似五月十五日下午自由風播出一段南丫島海難家屬投訴之特別製作，十分專業，旁白動人到極，如果我係廖漢波，聽到可能會撼頭埋牆；但港台時事節目主持人多數對財經新聞唔在行，啲客席主持多數係社會政治人士，佢地講財經就時有偏差咯。但即使係經濟學專家，如果貪快順手寫亦有偏差，例如呢一段文字：
「中小學的教科書價格高昂和年復一年的大幅加價，其實早已為人詬病，每年暑假時新聞總會對此有所報道。很多家長會和傳媒認為，出版商為了『賺到盡』，不斷編訂教科書推出新版書，令舊版書的價值下跌，阻礙家長購買舊書的意圖，迫令他們花錢買新版書。」