【專訪 】
有「清盤王」之稱的德勤企業重整服務亞太區主管合夥人黎嘉恩，過去曾處理不少上市公司清盤及重組的工作。而在清盤及重組工作過程的前前後後，負責以獨立身份監察公司營運情況的獨立非執行董事，往往扮演着重要的角色，他表示：「好多情況喺INED（獨立非執董）發現公司有問題，就請我哋入去。」
記者：吳永強
過去有不少問題公司在「爆煲」前已被「事先張揚」，黎嘉恩認為在董事會內的獨立非執董應記一功。他指出，由於公司管治的概念日益成熟，加上獨立非執董亦越益清楚自己所要承受的責任及其角色是要顧及全部股東的權益，而非單一個股東或主要股東的少數利益，故此「近年越來越多情況是獨立非執董發現公司有『爆煲』徵兆，主動邀請獨立第三方幫忙。」
蠱惑報告信唔過
雖然越來越多獨立非執董角色幫手「踢爆」問題公司，惟他亦認為並非全部獨立非執董均稱職合格，部份更間接對股東帶來損害。他指出：「好似我之前處理過嘅一間公司，公司話向第三方進行收購，而獨立非執董睇完由董事會提供嘅估值報告就信晒佢哋，但到我哋翻查原來喺關連交易，就連估值報告都係唔啱嘅。」
除了在監察公司日常經營狀況時擔當重要角色外，獨立非執董在公司「爆煲」後更尤其重要，亦往往是黎嘉恩工作上的「好拍檔」，「獨立非執董都會好open話畀我哋聽，佢喺個董事會咁耐過去睇到有乜issue，佢哋睇到有乜問題，講畀我哋知佢嘅獨立意見……咁獨立非執董咁獨立，正常可信性都會高啲。」他又指，在進行清盤及重組工作途中，不時會遇到公司有意無意的阻撓，此時便有需要獨立非執董出手相助，「（公司）出事嘅時侯會同董事會拎資料，有時畀料公司唔配合，咁就要INED去push，所以佢哋個role好重要。」
集體跳船要小心
由於獨立非執董具獨立性及主要負責監察的職責，因此黎嘉恩認為若有獨立非執董突然唔撈，特別是短時間內相繼陸續「跳船」，小股東就應打醒十二分精神，或意味公司營運已響起警號。他指：「好多人跳船可能係有佢控制唔到嘅情況出現，佢唔想孭呢個風險……因為你家公司有咩問題，隨時佢都會俾人告。」