商務及經濟發展局前局長馬時亨細女馬露玲，今年十月先至出嫁，但呢位準外父家陣已經開心定先。佢噚日以首席評審身份出席十大傑青提名活動之後，一講到嫁女，即刻笑到見牙唔見眼，雙手抱拳不斷做恭喜動作，話「細女10月會擺酒，真係好開心！」
細女10月出嫁
馬時亨大女馬露明前年底已經嫁咗，今年輪到喺投行工作嘅細妹出嫁，聽講準新郎係一位律師。做得外父應該都會想做埋外公，被問到幾時抱孫，本身係基督徒嘅馬時亨就話，冇落柯打叫阿女生仔，但「有冇孫抱要等神嘅安排」咁話。
講番十大傑青選舉，馬時亨連續第三年任評審，佢認為傑青除咗要喺個別領域有特別成就或貢獻，仲要負起企業社會責任，「淨係擔任CEO冇用，仲要有時間回饋社會，最好能發放正能量。」
鑑於評審要求好嚴格，仲試過揀人選時起爭執，所以舊年只得八人成為傑青。佢強調，政治因素同背景唔係評審考慮範圍，呼籲今年多啲企業提名員工參選。