一個又一個陪你成長的「朋友」退下了，巨鴨不辭而洩，據講復出有期，但眼見網傳牠慢慢倒下的影像仍是令人有點感嘆，尤其在這個漏氣年代，香港人總是容易觸景傷情，其實早排西九那堆巨型米田共也同樣一瀉如注，但大家反而頗為受落，屎始終係一堆屎，最後一沖了事。
所以碧咸又再一次贏了，「我想在最高峯時離開！」有心理學家說人們對往事的回憶孰好孰壞，很視乎最後印象，碧咸久經江湖磨鍊當然深明此道，在加利仔的訪談中他說閃過退休的諗法是在歐聯比賽時，被美斯扭過的一刻出現，骨子裏還是充斥着英式幽默，每個聽到的都知這是笑話吧，否則可能全世界的球員都已經要在排隊退休了，也有說是因為費Sir終於退休，碧咸心諗重返奧脫福無望所以殘念掛靴。
碧咸的臨別贈言，話最想大家記得佢係一個非常落力的足球員，在加利仔面前如此決志，確實令人對佢的從一而終感動，但諗番轉頭，其實就係碧咸仔自己一路為自己建立了一條非一般球員的路，我哋先會淡忘咗佢原本嘅身份，而亦因為佢本身已經晨早變身，所以佢宣佈退休一刻，沒有哀傷只有震撼，大家之後只會更期待佢嘅第2波，同佢一齊長大嘅朋友放心，碧咸將會繼續喺你生活中出現。
碧咸俘虜全球，有人話係因為外型煞食，品牌效應，反而球技仲係其次，你知道佢嘅「七旋斬」最勁係乜？唔係準確咁簡單，而係預知嘅能力，佢畀波嗰一刻，腦中已經閃出兩秒後，皮球嘅落點同隊友嘅走位，呢種預知能力係先知。
由曼聯出道時食正英超成立兼收費電視面世，碧咸都彷彿知道晒足球時代嘅趨勢，轉會遇上皇馬及西甲嘅盛世，再喺適當時間到美職聯幫上一把，以及短期內以最有效率態度同AC及PSG擦出火花，仲有前排「疑似」中超大使嘅曝光，通通可見碧咸嘅先見之明，有人話碧咸似畢彼特，因為星光，我就話佢似畢菲特多啲，因為眼光。
我懷疑，碧咸退休之後曝光反而會更多，繼續身體力行做佢嘅足球預言家，而我哋就繼續做嗰班大驚小怪嘅無知股民。
keyman
now TV主持
mailto:[email protected]