利物浦後衞加歷查喺英超煞科戰之後就會掛靴，由於紅軍喺煞科戰嘅對手係已降班嘅昆士柏流浪，故外界都估計如果紅軍喺比賽博得12碼，會交畀加歷查主射，等佢有個美好回憶，但呢名前英格蘭國腳卻話：「我絕對唔會主射12碼！試想如果你喺掛靴戰射失12碼，就會成為人哋茶餘飯後嘅話題。」可惜馬會呢場波冇開「首球」，唔係加歷查嘅貼士就有用。