各地聯賽形勢早已近大定，嚟緊歐聯決賽只上演「德德大戰」，原本沒期望、等收爐嘅歐洲5月，突因「英」系新聞熱鬧起來。今晚英超煞科日，唔知會有乜大事發生，不過先向有啲根據嘅估波埋手；全日重心捧維拉作客光榮降班嘅韋根，[+1]兼冷W，趁對手拼到殘，望維拉鋒將勿失良機，收爐戰打多場身價波。
忠於英超嘅球迷，今夜都會向唔係同路人嘅費Sir、史高斯及加歷查作最後致敬；我哋體育組也會透過「最後一夜」播晒10場嘅畸寶，由當值「即時新聞」嘅同事們贒實各場形勢，捕捉精采一刻及即時形勢，將圖文第一時間向讀者呈上。告別夜，對我哋呢班生果嘅傳媒人，先係精采嘅開始。
倫敦3雄混戰爭兩個歐聯席位，作為阿仙奴球迷，小弟其實唔係太着意兵工廠一定要喺雲格合約最後一年，即來季延續第16屆踢到歐聯嘅「虛名」。嗰1,000萬鎊首圈分組賽收益，對年賺數千萬鎊嘅阿仙奴，唔係承受唔起嘅打擊，斷纜反而或迫使雲老喺告退前來個大反擊，積極擴軍也未定；反而最唔想係對頭宿敵熱刺攞到後，進一步大肆擴軍兼留得住雙料足球先生加里夫巴利，放虎歸山，來屆受「車熱」再夾擊，更難受。所以煞科戰對廠迷，可能先係一個延續至來季嘅新戰鬥。
呢3支有得爭嘅倫敦隊個W開得熱；先講車仔，莊家開出讓半/一盤，又觸動小弟神經。英超波開得呢個盤，下盤常見，要博上盤贏2粒食晒全格，印象中少之又少；而且車仔剛又拼盡贏埋個歐霸盃，歐聯席位又十拿九穩，只剩名次，迎戰極硬淨兼莫帥最後一次領軍嘅愛華頓，和波係合理賽果。
阿仙奴作客紐記有中鋒基奧特復出，求贏本錢大增；但同屬法語系球員密佈嘅紐卡素會否放兵工廠一馬，小弟唔敢講，呢場博入球「大」又無分頭，不如默默支持好了。
最好博冷係求必勝嘅熱刺對新特蘭，上仗新特蘭果然hea和修咸頓終護級成功，今場後防冇埋從熱刺借得嘅丹尼路斯壓陣，防線料進一步削弱；但迪肯尼奧就係靠將隊波轉型主攻先至護級成功，今場兩隊唔會側側膊，估計熱刺有力大勝而黑貓又會入到波，會試博總入球5、6球。
重心，放喺大家以為無關痛癢嘅下游戰，維拉作客已篤定降班嘅韋根。講轉型，維拉今屆飽歷驚風散，不過重用嘅新人喺下半季越打越好，加上有朝氣，唔會好似史篤城班人暮氣沉沉，咁先留到級。
經驗豐富兼射門命中率高嘅艾邦拉荷，近兩個月出賽頻率回升，令兩位打起嘅年青前鋒賓迪基同安祖斯韋文如虎添翼，球會話明後兩者來季會大幅加人工，不過受到大會挖角，留隊屬未知數，想提升叫價，盡情數糊係最佳方法；碰上已拼殘兼堅持打3個後衞嘅韋根，就算賓迪基停賽，維拉仍有權開出冷W。更強嘅數據係，維拉近4客戰3勝同級球隊，唯一輸波只係作客奧脫福大敗，賀對手提早封王。
英超收爐，《英倫心聲》也要告別，有緣再見。文：蘋果波神