【貝沙灣→觀塘→太子】莊思敏早前俾本報率先踢爆同導演葉念琛撻着，但佢兩個為咗保護戀情，齊齊夾口供否認，不過有圖有真相都冇得唔認啦，所以葉念琛近排唔避嫌開新片《溝女不離3兄弟》力捧女友，前日仲親自監場贒實莊思敏同對手沈震軒拍車震戲。
睇到眼都唔眨
前日下午1點幾，莊思敏先做男友柴可夫，駕駛紅色平治載住葉念琛由佢嘅貝沙灣寓所一齊出發，第一站先送男友返觀塘嘅辦公室，葉念琛落車嗰陣頭髮亂晒，一臉惺忪，明顯似剛瞓醒，不過佢嘅警覺性好高，不時咁四圍望，然後佢仲喺車尾拎咗袋嘢就上樓。
莊思敏放低男友之後，就自己開車去咗太子趕拍《溝》片，佢因為早到咗就匿喺車化妝，原來佢要拍同沈震軒車震。大約4點幾，葉念琛到咗拍戲現場，親自監督女友演呢一幕，佢對住個mon眼都唔眨𥄫到實。白色透視恤衫現紅bra嘅莊思敏就騎喺沈震軒身上，佢哋喺車廂拍攝肉搏戲，由於車廂好翳焗，拍咗一陣莊思敏就成身濕晒，令上衣透視效果更顯眼，休息期間，佢哋都好緊張同葉念琛一齊睇play back。
採訪、攝影：楊浩賢、吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！