葉翠翠係05年港姐冠軍，出道以嚟不斷俾人話割雙眼皮、隆鼻等整容傳聞，但每次解釋都話係化妝同影相角度問題。前晚翠翠同應屆港姐張名雅、莊思明等喺尖沙嘴出席《2013香港小姐競選》本地招募行動，翠翠個樣又進化咗，以前被人話似莊思敏，𠵱家竟然變咗諸葛紫岐？
莊思明晒甩皮胸
翠翠前晚着咗條透視露背裝，應記者要求扭身回眸畀大家影相，發現佢嘅招牌四方面被削尖，面上膠質又重咗，但最誇張係個鼻，從側面睇呈現直立三角形，明顯同𠵱家播緊嘅《金枝慾孽貳》飾演書蘭嬤嬤個樣有好大分別。對於鄧萃雯同埋周旭明隔空互寸，佢話人微言輕唔敢多講，但就唔介意飛紙仔拍劇：「有劇本就要背，飛紙仔反而做少啲功課，好彩自己背得切，有好有唔好啦。」
同場嘅莊思明大晒甩皮胸，佢話之前去沙灘游水兼曬太陽，問係咪同緋聞男友陳司翰同行？佢笑話：「同朋友啫。」張名雅就爆叫咗好多朋友參選港姐，可惜冇人肯制。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！