唔經唔覺，康城影展已經去到第66屆，今屆華語片得賈樟柯套《天注定》爭大獎，劉嘉玲套《過界》入圍「一種關注」，已經算巧威威啦。不過，曾幾何時康城影展係華語片天下，尤以00年嗰屆最誇張：
內地嘅姜文憑《鬼子來了》奪得評委會大獎、台灣嘅楊德昌就憑《一一》攞最佳導演、至於香港囉喎，之唔係梁朝偉憑《花樣年華》登康城影帝囉！
時間追溯返去00年5月，王家衛套《花樣年華》係壓軸電影，臨康城上映前一個月都仲補拍緊，都不知幾牙煙。事實證明慢工真係出到細貨，偉仔憑佢嗰對憂鬱嘅眼神，將周慕雲呢個角色演繹得出神入化，結果捧走最佳男主角。宣佈得獎嗰刻，去採訪嗰兩位記者直情嗌咗出嚟：「偉仔，好嘢！」偉仔上台致辭就冇乜驚喜，淨係用好簡單嘅英文話：「多謝評審委員，我今晚覺得好榮幸，我要多謝王家衛同埋喜歡呢部電影嘅人，我興奮得想大叫！」至於仲未係梁太嘅劉嘉玲，就感動得眼紅紅呀。
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！