【油麻地彌敦酒店】無綫劇《金枝慾孽貳》雖然收視唔得，但戲外劇情似乎更精采！一班《金枝貳》演員伍詠薇、陳豪、蔡少芬（Ada）、黃德斌、楊秀惠同關禮傑等，前晚約埋喺油麻地彌敦酒店食飯，仲有監製戚其義，獨欠呢排是非多多嘅如妃鄧萃雯，擺明飛起佢啦！
前晚9點半，一班演員食完晚飯意猶未盡，再去唱K，但陳豪同Ada都冇去，伍姑娘噚日喺微博上載啲相，似乎玩得好開心。成班人玩到凌晨12點陸續離開，有家室嘅關禮傑最先走，梁嘉琪反問記者：「仲未走呀？佢哋有排呀！」至凌晨1點半，仍未見伍姑娘等人離開。
其實雯女呢排真係好好火，同編審周旭明隔空互罵，日前佢接受內地傳媒訪問又繼續彈《金》劇對白難明，佢話：「大家都說這些台詞不是人聽，其實我也覺得不是人講的！」
德斌寸雯女博宣傳
搞到一向唔多出聲嘅黃德斌都忍唔住出聲，喺微博暗寸偽人宣傳手法低智卑劣，佢噚日接受電台訪問時仲越講越㷫：「九年前一樣嘅班底，當時製作到如妃等人物，點解今次話拍唔到，若果指冇劇本，可以接劇時話唔拍，唔係出街先話冇劇本唔明，不論係為個劇宣傳定為自己宣傳，目的已經達到。」而曾同周旭明合作嘅黃日華、張兆輝等前晚喺灣仔出席活動，佢哋都覺得飛紙仔好有問題，黃日華仲放棄睇《金枝貳》㖭！
採訪、攝影：李志明、羅德光、王崇穎
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！