無疑，我對文仙尼係有情意結。一來他來自意大利；二來夠型！記得06年有幸到訪意國，訪問當時教緊國米的文帥，上午訪問時他文裝一度，笑容親切；下午全副武裝在訓練場督師，還心癮起與助教米赫洛域比試射罰球，結果3射皆中。3個字，型到震！三來，他亦曾教過兩支我最愛的意甲球隊，費倫天拿與國米。
文仙尼有缺點嗎？絕對有。自國米年代，歐戰表現一直不佳，之前在國米衰防守差；到曼城防守進步了，卻在面對強隊時，臨場調兵變陣功夫未具火喉，往往未能在劣勢下反勝，令他未能登上更高台階。
然而，我最想講就係「火喉」二字。費Sir頭4年在曼聯，只得一個足總盃，3季聯賽排10名以外；相比下，文帥在曼城首4季，聯賽3次入3甲、一次冠軍、一次足總盃，成績仲更亮麗，卻已要食無情雞。都係嗰句，費Sir確係「生得逢時」，生於老闆要求和耐性都仍然合理的年代；否則若像文仙尼這樣，煲湯煲咗4年就揭蓋：「未出味喎！」於是成煲倒咗，何來往後整整26年火喉的王 朝盛宴？
成王敗寇，足總盃的落敗確係肉酸。但見曼城球迷會在文帥被炒後拉隊到球會抗議，就知球迷幾有情義。秘書長奇雲柏加說：「文仙尼為我們打破35年獎盃荒，知道對我們的意義有幾重大嗎？」情義？只有球迷才理會；老闆？只會問：「情義？幾錢両呀？」
方柏翹
now足球評述員