車路士加冕盃賽之王！周三歐霸決賽，車路士靠伊雲洛域補時絕殺，以2:1擊敗賓菲加捧盃，成為第4支盡攬歐洲3大盃賽的球隊。油王入主藍戰士後花費逾8億鎊招兵買馬，到今天，球會終贏盡歐洲各大錦標。
面對賓菲加的壓逼性踢法，有泰利及夏薩特缺陣的車路士在上半場陷於劣勢。也許這是領隊賓尼迪斯留前鬥後的戰術，藍軍換邊後加強壓力，59分鐘靠反擊開紀錄；費蘭度托利斯（費托）單刀埋門，冷靜地扭過門將射入。
贏盡歐洲3大盃賽
賓菲加隨即換人加強攻力，68分鐘由奧斯卡卡度素主射12碼扳平。不過，賓菲加已是強弩之末，球員體能下降，有的更加抽筋；中堅加雷在78分鐘因傷離場，防線岌岌可危。補時3分鐘，車路士靠中堅伊雲洛域在無人看管下，把握角球攻勢頂入，以2:1絕殺對手，獲得歐霸冠軍及500萬歐元獎金（約5,000萬港元）。
當泰利捧起獎盃時，意味住車路士刷新多項紀錄。繼祖雲達斯、阿積士及拜仁慕尼黑，他們是第4支3大盃賽之王，齊集歐聯、歐霸（及其前身歐協盃）和已停辦的歐洲盃賽冠軍盃。球員方面，費托及桑馬達完成世界足球大滿貫，包攬世盃、歐國盃、歐聯及歐霸4大錦標。全靠車路士捧盃，英超來季的歐洲聯賽排名才能以約1分力壓德甲，續排次席。
除了感到光榮及自豪，賓尼迪斯點名大讚費托，「今季，我們很多球員都越踢越好，包括費蘭度。很多人認為我可以激活費托，最後他真的進步了很多，我非常高興。」
林柏特續約一年
賓帥亦再次暗示摩連奴下季回歸，「雖然大家都預料是那個人，但我不是負責宣佈的那位，我不清楚的。有件事我可以肯定，車路士下季會更強，球會將花費1億鎊（約12億港元）去買3至4個球員。」此外，副隊長林柏特賽後終獲球會續約一年；該34歲英格蘭中場表示：「我非常高興！所有人都知我渴望留效車路士。我多謝阿巴莫域治先生，我愛這間球會、球員、職員以及球迷，那些由我加盟起便支持我的人。」球會行政總裁古尼爾指續約談判由去年底展開，一直都很順利，他盛讚林柏特立下不少汗馬功勞。
車路士成為盃王，還有一人不可不提；他是班主阿巴莫域治。入主10年，阿巴任用過9位領隊，豪花逾8.6億鎊（約95億港元）買人，助球隊奪得13項錦標，包括上季的歐聯。儘管阿巴周三沒有到場捧盃，但相信他都非常安慰；也許最令他留憾的是去年底失落世冠盃，令車路士暫無法齊集所有球會級重要錦標。文：咖喱
花絮：泰利扮超人極速換衫
泰利都算黑仔，上屆因停賽踢唔到歐聯決賽，今屆就因傷打唔到歐霸決賽。賽前呢位車路士隊長，着晒西裝坐喺場邊睇波，但佢手腳認真快，一見到球隊喺補時3分鐘入絕殺球，嗱嗱臨走入更衣室換番套波衫出嚟捧盃。不過有網民笑佢可能好似超人咁，早就着定件波衫喺入面，一扯開件恤衫就可以變番做車仔球員。
A高被薦做三獅隊長
艾殊利高爾啲喜訊一單接一單。周三佢幫車仔贏咗歐霸盃，賽前有傳英足總委任佢做三獅兵團嘅隊長，喺本月29日同埋下月2日領軍，踢對愛爾蘭同巴西嘅友賽。有101頂喼帽嘅A高，喺7個月前就泰利種族歧視一事鬧爆英足總，英足總唔記仇之餘仲想畀個隊長佢做，但隊中仲有林柏特同朗尼等大佬，所以A高都未必做硬。
神射手助攻王非藍人
今屆歐霸盃曲終人散，車仔成為最後冠軍，但入得最多波嘅就唔係佢哋嘅球員，而係拉素嘅高薩克。呢位捷克前鋒喺今屆賽事上陣10場入8球，比拿玻里嘅卡雲尼，同埋賓菲加嘅奧斯卡卡度素入多一球，成為賽事嘅神射手。至於助攻王亦都唔係車仔球員，係由利雲特中場巴卡路奪得，佢總共喺9場比賽助攻6次畀隊友入波。