曼聯例喺季尾舉行周年晚會，以表揚一班球員整季嘅表現，而且今年仲要係領隊費格遜最後一季，個個球星梗係悉心打扮，好似尹佩斯、湯卡華利同連迪加特等，帶埋美艷女伴出席，自然成為焦點。日本球星香川真司雖然官仔骨骨，換上套型西裝，但因為未有女伴，一支公到場，感覺孤單咗啲。
香川單拖赴會，網上討論區即刻有好多佢嘅fans討論，催促佢快啲搵個女仔拍拖，畢竟曼聯不時有活動搞，希望下次唔好再見到佢冇伴咁悶。其實，香川一直都有唔少緋聞㗎，而最近就傳佢搭上咗混血𡃁模奈月Margaret，但暫時又好似冇乜動靜，睇嚟都要快快加把勁。
尹佩斯執番個桔
講番個周年晚會，除咗滿場飛嘅爵爺同每位球員有傾有講之外，最矚目嘅就係個頒獎典禮，今個球季由所有紅魔一隊球員選出嘅本年度曼聯最佳球員，由中場卡域克奪得；至於今季新加盟嘅紅魔射手尹佩斯，雖然入波停不了，但可能考慮到佢係曼聯新仔嘅緣故，啲隊友都係決定投卡域克一票。之不過尹佩斯都唔使失望，獲紅魔球迷投票「球迷心目中最佳球員」，即係等於電視台選男歌手咁，一個係最佳，一個係最受歡迎囉。